SimoneInguanez

Bis-saħħa tal-kompetizzjonijiet tal-poeżija organizzati lokalment, Inguanez ma baqgħetx iż-żagħżugħa mistħija li kienet, kif tistqarr hi stess. Meta kellha 14-il sena, hija bdiet tesperimenta bil-poeżija wara li rat eżempju ta’ “kolleġġjalità kommoventi”, kif tiddeskriviha hi b’mod affaxxinat, fit-tnedija ta’ proġett li kien involut fih missierha.

Il-kitba tal-ewwel poeżija għenet lil Inguanez toħodha drawwa li tikteb, u s-suċċess li bdiet tikseb fil-kompetizzjonijiet letterarji beda jgħinha tmur lil hinn mid-djarju, u eventwalment ġibdet l-attenzjoni tal-poeta u drammaturgu veteran, l-ikona letterarju Mario Azzopardi, li qabel li jippubblika wħud mix-xogħlijiet tagħha fil-magazin NEO.

Dan għenha ssib aktar ispirazzjoni mill-entitajiet lokali Inizjamed u PoeżijaPlus, fejn eventwalment kompliet ittejjeb ħilietha ma’ nies bl-istess passjoni, u b’aħbar tajba għal Inguanez, waħda minn dawn kienet il-poeta magħrufa Maria Grech Ganado, li mbagħad traduċiet xogħol Inguanez għall-Ingliż, f’volum bl-isem water, fire, earth and i (Inizjamed u Midsea Books, 2005). Din il-ġabra kienet it-tieni waħda f’sena importanti għal Inguanez, billi fiha ħarġet l-ewwel antoloġija tagħha, ftit mara ftit tifla (Klabb Kotba Maltin, 2005), li introduċiet dawk li kellhom ikunu l-faxxini rikurrenti f’kitbet Inguanez: it-tfulija, is-silenzju, il-memorji, ix-xewqa u l-ilma; temi li għall-poeta huma “elementari, fertili u ġenerużi”. Għażla eklettika bħal din hija bla dubju megħjuna mill-isfond akkademiku u professjonali varjat ta’ Inguanez. Wara li gradwat fil-liġi, il-forensika u l-psikoloġija, Inguanez bdiet tagħmel parti mill-Kunsill Nazzjonali tal-Ilsien Malti minn meta dan twaqqaf fl-2005. Fl-2007 kienet il-kittieba residenti fl-International Writers Programme f’Iowa.

Inguanez illum hija inkarigata mid-Diversità u l-Komunitajiet fi ħdan il-Kunsill Malti għall-Arti, u b’hekk il-maniġment fl-arti kellu rwol importanti f’ħajjitha għal dawn l-aħħar snin. Hija kariga li hi tgħid li għalfet lill-poeżija tagħha b’modi indiretti, għax għallmitha ssaħħaħ id-don kreattiv tagħha b’etika ta’ xogħol aktar dixxiplinata u sostenibbli.