SimonBartolo

Bartolo beda jaffaxxina ruħu bil-qawwa tal-istejjer sa minn età żgħira. Missieru kien jirrakkonta lilu u lil ħutu stejjer li minn darba għal oħra kienu dejjem jiżżewqu xi ftit aktar. Għal Simon tifel, il-kunċett li tiġbor dinjiet sħaħ u tqajjem emozzjonijiet bħall-biża’, il-ferħ u d-diqa, permezz tal-att sempliċi tat-taħdit, kien għalih seħer sħiħ. Huwa għalhekk li jara l-kelma bħala finzjoni li jista’ jkollha effett kompletament differenti bejn il-qarrejja skont il-kuntest li fih titlissen. Huwa jemmen li teżisti rabta unika bejn l-istorja, ir-rakkontatur u l-qarrejja, element li jista’ jinħass f’xogħlu.

Bartolo jqis lil Trevor Żahra bħala influwenza ewlenija. Il-kotba tiegħu ġegħluh jifhem l-importanza tal-lingwa nattiva. Huwa kien imur fi skola li ma kinitx tippermetti lill-istudenti tagħha jitkellmu bil-Malti fil-binja tagħha, bit-theddida ta’ kastig jekk din ir-regola ma titħarisx. Għal Bartolo adolexxenti, Żahra kien ribell li ma beżax jitkellem bil-lingwa pprojbita.

L-empatija tiegħu għal dawk emarġinati tidher f’A Seat at the Table: The Coming of Age of the LGBTIQ Movement in Malta (MGRM, 2018), rakkont dettaljat li jinkludi diversi intervisti dwar l-evoluzzjoni tad-drittijiet tal-gays f’Malta. Waqt li dan huwa ktieb storiku dwar wieħed mill-aspetti tad-drittijiet ċivili lokali, l-istil partikolari ta’ Bartolo jinħass f’kull paġna, u jwassal dan il-ktieb jinqara daqslikieku storja personali.

In-narrattiva ta’ Bartolo hija msejsa fis-supernaturali, faxxinu li huwa evidenti sa mix-xogħlijiet bikrija tiegħu, fosthom It-Triloġija tal-Fiddien (Merlin Publishers, 2007-2009) li kisbet popolarità kbira, u li kiteb flimkien ma’ Loranne Vella. Bħalissa jinsab fl-istadji finali ta’ Kreatura tad-Deheb, l-aħħar ktieb ta’ triloġija oħra, Ruxxmata Kreaturi (Merlin Publishers, 2020-). Din it-triloġija tirrakkonta l-istejjer taċ-ċkejknin Nadja u Antonin, li flimkien ma’ kast eċċentriku ta’ qrabathom, jeħduha kontra kreaturi mill-folklor Malti. Waqt li din it-triloġija tista’ tiġi klassifikata bħala tal-biża’, Bartolo jaddotta stil leġġer, li mingħajr wisq sforz jwaħħad il-waħx, il-kummiedja, l-istramberiji u mumenti ta’ assurdità. Il-ħakma tiegħu tal-lingwa tiżgura tranżizzjoni bla xkiel minn ġeneru għall-ieħor, u toħloq vuċi li hija tiegħu biss.

Ix-xogħol ta’ Bartolo huwa xhieda tal-apprezzament profond tiegħu tar-rakkuntar, il-lingwa u l-qawwa tal-kelma biex dawn jagħġnu emozzjonijiet u perċezzjonijiet varji. Il-kitba tiegħu tingaġġa lill-qarrejja, tipprovokahom biex jaħsbu u hija personali b’mod distintiv, waqt li wkoll tħalli fuqhom impatt fit-tul.