Bijografija
Glen Calleja ġej minn sfond ta’ teatru esperimentattiv imsawwar fi tradizzjoni fejn xogħol l-attur jitqies bħala proċess ta’ riċerka, u ilu dawn l-aħħar snin jaħdem bħala legatur tal-kotba. Huwa jemmen li x-xogħol bl-idejn huwa dak li jwassal għal esperjenza li tittraxxendi, u din il-fehma tiegħu tagħġen l-etika tax-xogħol tiegħu.
Mur fil-biblijografija
Ix-xogħol letterarju ta’ Calleja huwa dwar il-ħolqien u s-sovverżjoni tax-xbihat. Huwa juża dan bħala l-bażi fuqiex jagħti jew jistieden rispons affettiv u estetiku. Iħaffer fil-fond ta’ stejjer li jmissu l-umanità, u jiskava s-saffi li jostru u jiżvelaw ir-relazzjoni problematika li għandna ma’ min aħna, fejn qegħdin u ma’ min.
Iswed Assolut (Pubblikazzjoni Kopin, 2016), pereżempju, hija ġabra ta’ poeżiji li tesplora n-narrattivi differenti tal-(im)migrazzjoni Afrikana lejn Malta u l-bqija tal-Ewropa. Kull paġna għandha lista nnumerata ta’ versi u kull sett ta’ numri joħloq biċċa separata. L-importanza ta’ kull vers hija enfasizzata: wieħed huwa mġiegħel jieqaf ftit wara li jkun qara vers, qabel ma jimxi għal li jmiss. Id-diskors fil-midja u fl-isfera politika fuq l-(im)migrazzjoni ħafna drabi jiffoka fuq in-numri, il-figuri u l-istatistika, u rari jiffoka fuq il-bnedmin. Hu u jagħżel din il-forma partikolari, Calleja jagħti struttura differenti lill-istejjer fuq individwi veri, iżda li jitħallew bla isem, u jagħtihom il-leħen individwali tagħhom.
B’dan il-mod, Calleja jittraxxendi realtà u jidħol f’oħra. It-tifsir u l-konfini huma sfidati kontinwament, (ri)negozjati u (ri)immaġinati b’modi varji, u wieħed irid jaċċetta dan biex jifhem xogħol Calleja. Ir-Raġel (AWL, 2010) kienet installazzjoni tal-poeżija mtellgħa bħala meditazzjoni fuq kostruzzjonijiet li jiddeskrivu u jiddefinixxu l-ideat tal-maskulinità fil-Punent. Calleja qies il-fiżikalità u l-permanenza tal-ktieb simboliċi tal-awtorità eġemonika, u għalhekk, minflok ma t-test ġie stampat fuq il-paġni, inkiteb bl-id fuq il-ħitan ta’ residenza privata. Ingħata wkoll numru tal-ISBN, iżda 24 siegħa wara, il-ħajt reġa’ ngħata ż-żebgħa. B’hekk inxteħet dubju fuq il-forma tal-ktieb bħala korp awtorevoli u awtoritattiv. Ingħata forma oħra li wriet il-fluwidità, l-effimerità u l-impermanenza tiegħu (bħala memorja, bħala rikordji fotografiċi, bħala avveniment dokumentat).
F’kull flgħaxija kif mal-għabex tnin u tmut saħħet il-jum (ippubblikat minnu stess, 2014), Calleja jiddekostruwixxi u jiddekontestwalizza stejjer ta’ pazjenti bil-kanċer, u jagħtihom ħajja ġdida bħala poeżiji li jirriflettu n-narrattiva tqila u intima fl-istess ħin. Huwa intervista lill-pazjenti u minnhom evoka stampi li provdewh b’katalgu ta’ kif kull persuna tħossha minn ġewwa, ta’ ġabra ta’ memorji ta’ ħajja mgħixa lil hinn minn sempliċi dijanjosi. Għal darb’oħra, Calleja wera kif il-kunċett mistur jestendi lil hinn sew mis-suġġett, u kif l-interazzjoni bejn it-tnejn tista’ tkun trasformattiva.
Bijografija miktuba minn Noel Tanti u maqluba għall-Malti minn Sephora Francalanza
