AdrianGrima

Għalkemm jikteb u jikkontribwixxi għall-kwistjonijiet u d-dibattiti kontemporanji, Grima huwa kemxejn xettiku tal-kunċett li l-poeżija tista’ tkun mezz ideali li tinstiga bidla soċjali u politika. Hu aktar jaħseb li huwa dak li wieħed jirnexxilu jagħmel bil-lingwa li finalment jagħmel differenza. B’referenza għall-aħħar ġabra tiegħu, Grima jikkunsidra l-perċezzjoni li l-poeżija għandu jkollha impenn politiku. Huwa konxju li xogħlu għandu t-tikketta ta’ xogħol b’impenn soċjali, u jifhem ir-raġuni għaliex huwa magħruf hekk, iżda dan wasslu wkoll biex jirrifletti fuq l-impatt ta’ tikketti bħal dawn. Fl-aħħar mill-aħħar, Grima u l-poeżija tiegħu huma marbutin mar-realtajiet soċjali, u għalhekk huwa mifhum li l-kuntest huwa essenzjali, u li l-lingwa ma tistax tkun miftuma mill-ideoloġiji daqskemm wieħed jixtieq.

Apparti l-aspett soċjali, Grima jinteressawh ukoll temi universali, bħall-imħabba u l-mewt, imma sikwit jagħtihom xi żvolta interessanti. Ngħidu aħna, huwa intrigat mill-iżvilupp tal-imħabba tul iż-żmien, filwaqt li b’rabta mal-mortalità, huwa jiffoka fuq kif hu ffaċċja l-marda terminali ta’ missieru u l-effetti li ħalliet. Huwa jidħol f’dan is-suġġett delikat b’kuraġġ u onestà, u dan joffrilu l-opportunità tal-introspezzjoni. Jammetti li l-aspett terapewtiku u katartiku ma jneħħix l-uġigħ, imma jagħtih iċ-ċans jitqabad mal-mortalità permezz tal-lingwa, il-poeżija, u l-letteratura inġenerali.

Mil-lat lingwistiku, Grima jfittex li jegħleb l-isterjotipi u l-użu komuni tal-lingwa. Huwa jagħmel dan billi jkisser il-lingwa Maltija, iwessagħha u jesperimenta bir-regoli kodifikati tagħha. Huwa xprunat mill-isfida li joħloq il-lingwa mill-ġdid, li jirreżisti l-espressjonijiet stabbiliti, u li jkun aktar kreattiv bl-espressjonijiet idjomatiċi li juża. Ironikament, il-poeżija tiegħu tmiss kemm ma’ dak li hu infinit, kif ukoll ma’ dak li hu marbut biż-żmien. Mistoqsi x’jista’ jkun il-legat tiegħu, Grima jindika li jixtieq jibqa’ mfakkar bħala poeta li ħoloq mill-ġdid jew b’xi mod arrikkixxa l-lingwa Maltija.